Linux, cwè ç’ ki c’ est d’ ça ?

Linux, c’ est come Windows oudonbén Mac OS, c’ est l’ mwaisse programe ki fwait roter tos les programes di vosse copiutrece dizeu. Li diferince c’ est k’ Linux est on libe programe : il est a tolmonde eyet tolmonde li pout candjî. Les troes cwårts do tins vos l’ poloz trover gratiss, metans e l’ aberwetant del daegntoele (l’ etrernet). C’ est pask’ il est libe ki des waloneus del soce nén rcwårlante (asbl) Li Rantoele ont dispoy 1998 ratourné bråmint des programes come li bén cnoxhou betchteu waibe Netscape ou les elemints do scribanne (les dressêyes, les modules d’ apontiaedje, evnd.).

I gn a deus distribucions Linux ratournêyes e walon : openSUSE eyet Mandriva. Ene distribucion c’ est on ramexhnaedje des diferins programes : li sistinme di båze Linux mins ossu des programes di burotike, po betchter sol waibe, evoyî des emiles, des djeus, lére ses fitchîs multimedia et vos nd åroz. On pout astaler l’ distribucion a pårti d’ ene plake lazer CD ou DVD so s’ copiutrece po l’ eployî tos les djoûs.

Les distribucions Linux c’ est come les crinmes al glaece : vos les ploz aveur al fraijhe ou å tchocolåt, c’ est todi l’ minme crinme k’ est dvins, gn a kel gosse ki candje.

Linux so Wikipedia

2 Messages de forum

Linux, cwè ç’ ki c’ est d’ ça ? 7 juillet 2009 20:34

Vo dihez qui n’a qui deu linux e wallon. Ma d’ja looki e Ubuntu, et d’vin les linwes qu’on pou tchusi, li wallon i est avou. D’ji suppose qui c’est bin di nosse wallon qui djasait, et nin deune ote linwe qui s’noumereu com çoula avou.

Linux, cwè ç’ ki c’ est d’ ça ? 20 juillet 2009 22:04, par Djan

Bondjoû,

Mandriva et openSUSE sont les seules distribucions Linux ki les usteyes del distribucion sont rmetous e walon. Come KDE eyet Gnome sont po ’ne pårt ratournés e walon, vos ploz awè dins bråmint des distribucions Linux (Ubuntu, Debian et tchik et tchak...) vosse sicribanne (vosse buro) et des programes e walon mins nén les cis specifikes al distribucion. Pos Ubuntu, les programes come Synaptic (li manaedjeu des pacaedjes), les usteyes d’ apontiaedje di l’ ôrdinateur ni sont nén e walon.

Dins openSUSE, metans, ene grande pårt des usteyes d’ apontiaedje (astaler les programes, astaler l’ distribucion, les metaedjes a djoû, l’ apontiaedje del sori, et vos nd åroz) et bråmint des ptits detays ki sont-st e walon. Totes ces afwaires la seront en inglès (ou francès) dins ene ôte. Vos ploz tchoezi l’ walon a l’ astlaedje et tot s’ fwait e walon (ene grande pårteye purade). Et cwand vs åroz astalé, vos n’ åroz pus grand tchoi a candjî po k’ ça rote e walon.

C’ est don mitan vraiy çou k’ vos djhoz: vos ploz tchoezi l’ walon pos Ubuntu mins vosse esperyince serè a mitan e walon et i fårè pus tchicter pos ariver å minme tchois.

On va fé on "Live CD" bén rade (i nd a ddja onk di saye sol waibe vaici) pos aidî les djins as astaler åjheymint Linux e walon.

(Mande escuze pol tins k’ il a falou po responde mins dj’ a on robot k’ evoye des messaedjes SPAM sol forom eyet vosse esteut catchî ddins)

Rubriques

Dans la même rubrique

2 Messages de forum