Pidgin

Pidgin est on programe multi-protocole. Il eploye les ahesses grafikes (widgets) GTK, eyet l’ sistinme di ratournaedje gettext, k’ est l’ pus corant dins les libes programes.

Si eterface, come tos les programes do pordjet Gnome est simpe eyet speuré.

C’ est on bon ey åjhey programe po replaecî Live Messenger, GoogleTalk [1] oudonbén Yahoo Messenger. Mins atincion, les waibcames ni rotèt nén (co) avou Pidgin.

Les protocoles sopoirtés:

• AIM
• Bonjour
• Gadu-Gadu
• GoogleTalk/Jabber/XMMP
• GroupWise
• ICQ
• IRC
• MSN
• MySpaceIM
• QQ
• SILC
• SIMPLE
• Yahoo
• Zephyr

Vos ploz eployî sacwants conte sol minme tins dins l’ minme purnea. Insi, on pout awè s’ conte MSN eyet s’ conte Gmail dins l’ minme programe. Clapant non?

Astaler Pidgin dins on sistinme Linux

Pidgin est normålmint prézint dins les depots d’ programes di vosse distribucion. Enondez vosse manaedjeu d’ pacaedjes (metans Yast dins openSUSE) eyet tchoezixhoz l’ pacaedje pidgin. Astalez l’.

Åjheymint dins Mandriva ou openSUSE:

Aberwetez l’ fitchî pidgin-wa.mo. Adon, vos n’ avoz mezåjhe ki d’ ene seule roye di cmande dins on terminå. Alez dins l’ ridant wice ki vs avoz aberweté l’ fitchî “mo” eyet tapez: sudo cp pidgin-wa.mo /usr/share/locale/wa/LC_MESSAGES/

Enondez (ou renondez) Pidgin eyet i duvreut esse e wallon. Tot ça n’ rotrè ki si vosse sistinme a l’ walon come prumî lingaedje.

Dins ene ôte distribucion

On côp astalé l’ programe, prindoz l’ fitchî pidgin-wa.mo et sel rilomer a "pidgin.mo" (sins l’ "-wa"). I vs fåt après l’ copyî dins l’ ridant pol ratournaedje e walon.

I vs el fåt copyî dins l’ ridant /usr/share/locale/wa/LC_MESSAGES/ k’ est surmint ddja la.

Enondez (ou renondez) Pidgin eyet i duvreut esse e wallon. Tot ça n’ rotrè ki si vosse sistinme a l’ walon come prumî lingaedje.

Astaler Pidgin dins on sistinme Windows

Vos ploz aberweter Pidgin so: http://pidgin.im/

On côp astalé l’ programe, prindoz l’ fitchî pidgin-wa.mo et sel rilomer a "pidgin.mo" (sins l’ "-wa"). I vs fåt après l’ copyî dins l’ ridant pol ratournaedje e walon.

Li ridant pol walon n’ est surmint nén la; i vs fårè aler d’ aprume dins l’ ridant wice ki vos avoz astalé Pidgin (C:\Program Files\Pidgin\ ou ene sacwè insi), la dvins, vos voeroz on ridant locale\ alez î dvins. Å dvins di ci la, i gn a des ridants po tchaeke lingaedje, i vs fåt fé on novea pol walon, lomé "wa", et å dvins di ç’ novea ridant la, endè fé èn ôte, lomé LC_MESSAGES Ça fwait ki l’ tchimint complet ça serè ene sacwè come « C:\Program Files\Psi\locale\wa\LC_MESSAGES\ », c’ est la dvins ki vos dvoz copyî l’ fitchî «pidgin.mo»

C’ est nén co fini, i vs fåt asteure dire å sistinme ki vos vloz eployî l’ ratournaedje e walon. Po çoula i vs fåt defini ene variåve d’ evironmint, soeye-t i PIDGINLANG rén k’ po pidgin, soeye-t i LANGUAGE po tos les programes GTK. On va eployî LANGUAGE=wa:fr dabôrd (po tos les programes GTK, on dimande d’ aprume li ratournaedje e walon (wa), et s’ end a pont, li ci e francès (fr); vos ploz mete djusse "wa", ou co li djivêye di lingaedjes ki vos vloz, dispårtis avou des deus-ponts). Po çoula alez dins l’ menu d’ enondaedje (Start menu) da Windows, eyet la tchoezi l’ "Panea d’ controle" (Control Panel), eyet la so l’ imådjete "Sistinme" (System) eyet dins l’ purnea ki s’ drouve, sol liwete "Sipepieus" (Advanced). I gn a la on boton "Variåves d’ evironmint" (Environment Variables), vos l’ clitchîz, eyet la vos definixhoz l’ variåve "LANGUAGE" avou come valixhance (value) "wa:fr". Vola, pidgin si dvreut enonder e walon asteure (motoit ki vos dvroz rnonder l’ éndjole).