KOffice 1

KOffice est l’ shute burotike do pordjet KDE. C’ est l’ pus grosse shute burotike libe après OpenOffice. Come OpenOffice, KOffice sopoite li standård cogne di fitchî ODF, li cogne po-z esse dislaxhî des prôpietairès cognes da Microsoft:

• ODT pol tecse, ki vs pôroz bouter avou KWord
• ODS po les tåvleas, ki pôroz ahiver avou KSpread
• ODP po les prezintaedjes, a fé avou KPresenter
• d’ ôtès cognes po les 8 ôtes modules di KOffice

Li dierinne modêye est l’ 1.6 (KDE3). Ene novele modêye 2.0 rexhrè bén rade ki pôrè aler dizo Windows eyet MacOS. Nos esperans polou vs diner des ratournaedjes po cisse novele modêye eto.

I gn a k’ les troes mwaisses modules (tecse, tåvleu eyet prezintaedjes) ki sont pol moumint ratournés e walon. Nos voerans vaici pa dzo ces troes la.

KWord

KWord est l’ programe po vos scrijhaedjes. I fwait l’ minme ki des programes come OpenOffice Writer oudonbén MS Word.

Il eploye les coridjreces ortografikes aspell eyet ispell. Vos ploz adon î coridjî vos tecses e rfondou walon. Si eterface est simpe eyet si prémetowe cogne di fitchî est l’ ODT (come OpenOffice). Mins nerén, vos ploz ossu î lére et shaper les fitchîs KWD, RTF, TXT, WordPerfect, MS Write, evnd. Bén seur, i sait ossu lére les fitchîs DOC. Mågré ça, i n’ les apougne nén ossu bén k’ OpenOffice. I gn a des côps des rujhes avou des afwaires come les imådjes. C’ est pocwè on vs ecoraedje a vs siervi del cogne ODT (on l’ sait ouy lére dins MS Word avou on tchôke divins).

I sait ossu rexhe vos fitchîs e PDF eyet abaguer les fitchîs PDF.

KWord 1.6

KSpread

KSpread est l’ tåvleu d’ KOffice. Come MS Excel ou OpenOffice Calc, KSpread vos fwait des carculs dins des tåvleas. Il est co on pô å dzo d’ ôtes tåvleus po des spepieusès bouyes mins i frè vosse bouneur po ls eployaedjes di båze.

Si prémetowe cogne est l’ ODT. I sait lére/schaper les fitchîs KSP, CSV, HTML, TeX, DBF, evnd. I sait ossu lére et schaper les fitchîs XLS eyet ebaguer e PDF.

KPresenter

KPresenter est l’ programe po fé vos prezintaedjes et diaporamas come MS Powerpoint ou OpenOffice Impress.

Avou come prémetowe cogne di fitchîs l’ ODP, i sait ossu abaguer et ebaguer les fitchîs Powerpoint (PPT), Magicpoint, KWD, evnd.

Les ôtes modules

KOffice a ossu d’ ôtes modules mins i n’ sont nén ratournés e walon:

• Kivio, po fé des diyagrames on pô come Visio.
• Karbon14 po fé des dessinaedjes pa royes, on pô come Illustrator ou Inkscape.
• Krita, li Photoshop di KDE. Come Gimp il est libe, mins lî, sopoite li cwadricromie (CMJN).
• Kugar, po fé des rapoirts.
• KChart po fé des grafikes.
• KFormula po sapougnî des formules matematikes a stitchî dins, metans, KWord.
• Kexi, li manaedjeu d’ båze di dnêyes, come Access ou FileMaker. I sopoite les fitchîs MDB a l’ abagaedje.
• KPlato, li manaedjeu d’ pordjet po fé des diyagrames di Gantt eyet ôtes.

Endè sawè pus so koffice.org

Astaler KOffice 1.6 et les ratournaedjes dins openSUSE

Dins on linux avou l’ walon come prumî lingaedje:

• Astalez avou vosse manaedjeu d’ pacaedjes les pacaedjes koffice, koffice-presentation, koffice-spreadsheet et koffice-wordprocessing (eyet koffice-i18n-fr po les ratournaedjes e francès).
• Aberwetez ciste årtchive ci:

  

  koffice-wa.tar.gz

  Walons ratournaedjes di KOffice

• Disratrindoz çou k’ i gn a dvins eyet l’ copyî (avou les droets d’ root) dins l’ ridant /opt/kde3/share/locale/wa/LC_MESSAGES/.
  • Vos l’ poloz fé avou l’ eterface grafike ou en ene seule comande dins on terminå. Alez divins l’ ridant d’ aberwetaedje eyet tapez:
  • sudo tar xfvz koffice-wa.tar.gz | sudo cp *.mo /opt/kde3/share/locale/wa/LC_MESSAGES/ (so -z ene seule roye).
  • Dinez l’ sicret root cwand i l’ dimande.

Po -z ene ôte distribucion Linux, vos ploz fé l’ minme mins l’ ridant såme /opt/kde3/share/locale/wa/LC_MESSAGES/ pôreut esse diferin.