Vos nos ci, les soçons di Walotux

Djan Cayron, li waiburlin

Djan est l’ waiburlin [1] (li waibmwaisse) di Walotux. Dispoy 2007, i ratoûne des programes e walon. Il a ataké li rmetaedje e walon d’ openSUSE, adon il a rprins l’ ovraedje di Lorint eyet d’ Pablo po KDE eyet fé rexhe pol prumî côp l’ walon dins les lingaedjes oficires del prumire modêye di KDE4.

Li prumî côp k’ il a vlou astaler Linux e walon (i n’ î conoxheu rén d’ Linux di ç’ tins la, savoz), i n’ a rén trové d’ vraiymint a djoû po l’ aidî. C’ est pocwè il a yeu l’ idêye d’ enonder Walotux. Pol moumint, i tuze (et i boute) po fé l’ prumire "Vicante Plake" (Live CD) di Linux tot e walon (ça srè openSUSE) eyet continouwer a ratourner KDE et openSUSE (come mwaisse d’ ekipe).

Pablo Sarachaga, li mwaisse di Linux

Pablo, il est informatikî, est l’ prumî, avou Lorint Henschel, as awè ratourné des programes éndjolikes, gn a ddja pus d’ dijh ans did ça, e 1998...

C’ est a cåze di lu kel walon est eployî come langue dins les programes Linux. E 2002, i fourit eto les cåzes del ricnoxhance do walon pa l’ ISO, dizo l’ essegne "WA".

Il a bouté des anêyes pol societé Mandriva, comme responsåve des ratournaedjes et fé rexhe li prumire modêye di Mandriva e walon.

E 2003, i ratourna tot seu l’ eterface Wikipedia, po poleur diswalper ene eciclopedeye e walon. Pu ratourner e walon ene banslêye di hagnons k’ i gn aveut so ls ôtes Wikipedia.

E 2003, il a eto apontyî on programe po l’ codjowaedje des viebes e walon.

C’ est lu k’ a astaplé li prumî fond di dnêye po fé ene ricoridjrece e walon. Et copler Francis Baudoux e 2005, po basti ene ricoridjrece k’ on pout eto eployî so les sistinmes d’ operance Microsoft.

Il a ratourné Firefox 2, Pidgin et tot plin d’ ôtes programes. Ådjourdu il est l’ mwaisse di l’ ekipe di ratournaedje di Gnome eyet d’ ôtes pus ptits pordjets.

Francis Baudoux, li specialisse Windows del måjhon

Francis ratoûne et côde lu minme sacwants programes ki rotnut dins Windows (des djeus, on djouweu d’ muzike...).

Mins s’ pus bea ovraedje pol moumint c’ est l’ coridjrece d’ ortografeye po Windows. Il a radapté l’ ricoridjrece Linux (Aspell) fwaite pa Pablo po k’ ele rote dins Windows.

C’ est lyi ossu k’ a fwait l’ prumî waibe-blok (blog) e walon: Li waibe di l’ Enocin Citron.

Ådjourdu il a des pordjets d’ fé ene grande båze di dnêyes pol diccionaire di tot l’ walon e rfondou et poleur l’ eployî dins tos les sins: motî des sinonimes, motî walon pol Scrabble et tchik et tchak...

Stefane Quertinmont, high-tec ratourneu

Stefane, Catzi sol Daegntoele, nos a ratourné on sistinme d’ operance a lyi tot seu. Vos avoz on lijheu MP3 ou on iPod et i n’ cåze nén co l’ walon? C’ est fini avou Rockbox et c’ est a Stefane ki fåt dire merci.

Lorint Hendshel, li madjuster

Lorint n’ boute pus ådjourdu po l’ éndjolreye mins nos n’ volans nén rovyî çou k’ il a fwait. Tchanteu, scrijheu, rcwereu et ratourneu.

Il est onk des prumîs a vey li consecance del revolucion Etrernete. Eto, i va mete so les fyis, e 1996, on prezintaedje do walon (Li pådje do lingaedje walon) et e 1998 ene sinteze sol grammaire do walon: Li waibe del croejhete walone.

A pårti di 1998, il overe sol ratournaedje e walon des sistinmes Linux, et scrire si apriyesse a fwait so les fyis, dizo l’ tite: Avou l’ sistinme Gnu/Linux, voste éndjole djåze walon. C’ est s’ papî la ki va enonder Pablo Sarachaga sol voye do boutaedje pol lingaedje walon, et drovi l’ ouxh des libes programes sicrîts e rfondou walon.

Dispu l’ moes d’ djun 2003, Lorint Hendschel a prins on “condjî sabatike” po ses boutaedjes pol walon.