Astaler openSUSE 11.2 a pårti do DVD

Divant d’ ataker, i fåt aberweter li/les plakes lazer d’ astalaedje.

Cominçmint

Metoz l’ plake DVD d’ openSUSE dins l’ lijheu eyet renondez voste éndjole. Après l’ secwince d’ atake, vos arivez sol waitroûle d’ enondaedje do sistinme [1]

Candjîz d’ lingaedje e tchôcant F2 eyet tchoezi walon.

Tchoezixhoz Astalaedje eyet ratindoz kel programe d’ astalaedje si tchedje.

Etape 1: Waitroûle di bénvnowe

Vo vs la dins YaST. Totes les pådjes da YaST ont l’ minme adjinçmint: ene djivêye a hintche vos djhant les diferins dgrés eyet ewou çki vs end estoz, diferinnès fonccions dins l’ mwaisse pårteye ey adons les botons Aidance, Abandner, En erî eyet Shuvant.

Tchoezixhoz l’ lingaedje ki vs voloz (dj’ ô bén l’ walon!) si ça n’ a nén co stî fwait. L’ adjinçmint del taprece [2] serè tchoezeye sorlon l’ lingaedje di tchoezi. Pol walon ça duvreut esse li taprece beldje. Si vos l’ voloz candjî, el fijhoz vaici.

Po tcheryî pus lon, vos dvoz esse d’ acoird (accepter) l’ acoird di licince. Adon tchôkîz so Shuvant.

Etape 2: Sondaedje do sistinme

YaST va asteure analijhî vosse sistinme po defini ls apontiaedjes k’ i s’ doet siervi po l’ astalaedje.

Vos n’ avoz k’ a ratinde k’ i finixhe.

Etape 3: Môde d’ astalaedje

Asteure vos avoz l’ tchoes inte diferins môdes d’ astalaedje d’ openSUSE 11.2.

Môde d’ astalaedje

Pos astaler openSUSE 11.2, leyîz les tchuzes come ele sont. Si vs avoz on vî astalaedje d’ openSUSE, vos ploz tchoezi del mete a djoû avou l’ môde Mete a djoû. Si vs avoz dandjî d’ ripårer en astalaedje d’ openSUSE 11.2, li tchuze Remantchî on sistinme d’ astalé pout esse eployeye pos î awè accès eyet fé les rabistocaedjes.

Si vs avoz aberweté l’ plake lazer “Ôtes lingaedjes”, clitchîz sol boesse a clitchî Radjouter des Prodûts d’ rawete a pårti d’ on media a pårt.

Vos arivroz sos ene waitroûle avou on boton po radjouter on novea depot. Pol sôre di depot, tchoezi "Plake lazer CD". YaST vos dmandrè adon del sititchî dins l’ lijheu d’ plake eyet s’ endè siervi po l’ astalaedje des ratournaedjes walons.

Si vs voloz fé on spepieus metaedje a pont d’ l’ astalaedje, avou ddins l’ apontiaedje di l’ éndjolreye, vos ploz disclitchî l’ boesse a clitchî Eployî l’ apontiaedje otomatike. Ça n’ est rcomandé k’ po les cis ki savnut c’ k’ i fijhnut eyet ça rind pus long l’ astalaedje d’ openSUSE 11.2.

Etape 4: Mete a pont l’ ôrlodje eyet l’ coisse d’ eurêye

On vos va mostrer ene waitroûle avou ene mape divins. C’ est vaici k’ vos denroz les informåcions so vosse coisse d’ eurêye [3]

Coisse d’ eurêye

Vos ploz soeye-t i zoumer sol mape, soeye-t i vs siervi des disrôlantès djivêyes po tchoezi ene veye dins vosse coisse d’ eurêye. Sel date eyet l’ eure ni sont nén bones, tchoezixhoz Candjî po les coridjî.

Etape 5: Tchoes di l’ evironmint d’ sicribanne

Vaici, vos dvoz tchoezi li ké des 3 evironmints d’ sicribanne [4] vos vloz astaler. On ndè cåze dins l’ prezintaejde d’ openSUSE. Savoz kel pus pår ratourné e walon est KDE 4 eyet k’ c’ est l’ prémetou scribanne d’ openSUSE, ki GNOME est ossu e walon mins k’ XFCE (dins ls ôtes) n’ egzistêye nén dins nosse lingaedje (i srè håyné adon en inglès). Fåt sawè k’ pus tård dins l’ astalaedje ou après awè astalé, vos pôroz todi radjouter soeye-t i GNOME, soeye-t i KDE soeye-t i d’ ôtes manaedjeus d’ purneas come XFCE.

A vos d’ tchoezi.

Etape 6: Pårtixhaedje des deurès plakes

Vola l’ moumint k’ YaST va apontyî vos pårticions. Si vs avoz en ôte sistinme d’ operance [5] astalé so vosse copiutrece (en ôte Linux ou Microsoft Windows, metans), YaST va radjuster l’ grandeu di cisse pårticion pos awè del plaece assez po l’ astalaedje d’ openSUSE 11.2.

ASTEME: Si vs voloz raptiti ene pårticion d’ Windows pos astaler openSUSE sol minme plake, i vs fårè aprume schaper tot c’ k’ i gn a so vosse deure plake (po si ça va må) eyet disfragminter vosse astalaedje di Windows (avou on spepieus usteye, nén l’ ci da Windows). C’ est todi pus seur, si vos n’ savoz nén çou k’ vos fjhoz d’ astaler openSUSE sos ene ôte deure plake ki Windows oudonbén d’ disfacer completmint Windows.

YaST propôze des apontiaedjes ki duvrént continté les troes cwårts des djins. Mins nerén, si vs voloz candjî les apontiaedje propôzés, clitchîz so Candjî l’ apontiaedje des pårticions... Si vs voloz ahiver l’ apontiaedje da vosse, clithîz so Ahiver l’ apontiaedje des pårticions. Si vs voloz wårder les apontiaedje propôzés, clitchîz so Shuvant.

Etape 7: Ahivaedje di l’ uzeu

Vos aloz dveur ahiver [6] on conte d’ uzeu definixhant l’ mwaisse uzeu d’ voste éndjole (li ci ki l’ eploye li pus).

Tapez vosse no (li vraiy), vosse no d’ uzeu (tchoezi otomaticmint mins k’ vos ploz candjî) eyet on scret.

Prémetou, vosse sicret est l’ minme kel ci do manaedjeu do sistinme (conoxhou ossu come root). Li raloyaedje otomatike est ossu en alaedje, ça vs elodjrè otomaticmint a tchaeke enondaedje. Vos ploz disclitchî ces tchuzes po pus di såvrité eyet tchoezi en ôte sicret pol manaedjeu.

Etape 8: Tchuzes d’ astaladje

Vos ploz vey sol waitroûle shuvante li racourti di l’ astalaedje. Vaici gn a l’ djivêye di totes les etapes ki YaST va fé so vosse sistinme tins l’ astalaedje.

Po fé des candjmints, clitchîz sol tite del tchuze ou l’ disclitchî dins l’ dressêye Candjî come dins l’ waitroûlêye vaici pa dzeu.

Tchoes des programes

C’ est a c’ moumint ci k’ vos ploz tchoezi spepieusmint les programes ki vont esse astalés. Si vos n’ candjîz rén, vos åroz cwand minme ene banslêye di programes metous por vos avou tote li båze (OpenOffice, Firefox, cliyint d’ emilaedje, di berdelaedje sol moumint, broûleu d’ plake, djouweu d’ medias, evnd...). Vos ploz ossu tchoezi d’ radjouter des programes ki n’ sont nén prémetous come KOffice (cachî après koffice2), ene shûte burotike e walon ou li Djouweu Dragon (cachî après dragonplayer), on djouweu d’ videyo e walon.

Dins YaST, les programes sont-st astalés come des ‘modeles’, des groupes di programes ki sievnut al minme såme (vey noste årtike so l’ astalaedje des programes avou YaST).

Les ‘modeles’ k’ ons a dandjî po l’ astalaedje d’ openSUSE sont ddja prétchoezis. Mins nerén vs poloz ndè radjouter e clitchant sol ‘modele’ dins l’ pårteye hintche. Si gn a del plaece so vosse plake assez, tos les programes aloyîs sront ossu astalés so vosse sistinme.

Etape 9: Astalaedje d’ openSUSE!!

Si vs estoz presse as astaler, clitchîz sos Astaler.

I vs serè rdimandé si vs voloz astaler. Vos n’ pôroz adon pus rivni en erî, après awè accepté, l’ astalaedje atakrè.

Clitchîz sos Astaler pos ataker l’ astalaedje.

Asteure, YaST va fé l’ astalaedje d’ openSUSE. Sacwantès båres di progrès vont aparete djuskå diaporama so l’ astalaedje d’ openSUSE.

Cwand l’ astalaedje serè fini, li copiutrece renondrè.

Apontiaedje otomatike

Après awè renondé so vosse novea sistinme openSUSE 11.2, l’ astalaedje est fini. Mins non pus, divant d’ vos pleur siervi del copiutrece, YaST va enonder l’ apontiaedje otomatike di voste éndjolreye [7] eyet d’ vosse rantoele [8].

Come li dit s’ no, c’ est otomatike. Vos n’ duvoz rén fé.

Difén d’ l’ astaedje.

openSUSE 11.2 est asteure astalé. Cwand vs seroz elodjî, vos åroz l’ bondjoû del waitroûle di bénvnowe d’ openSUSE avou totes sôres di pondants et djondants. Vos sroz ridjiblé pos apontyî vosse sistinme di metaedje a djoû so fyis.

I n’ vos dmore pus k’ a mete a pont vosse sicribanne po n’ pus awè d’ messaedje en inglès, sawè lére les fitchîs MP3 ey awè l’ shûte burotike e walon.

Si vs avoz tchoezi KDE, alez vey cisse pådje ci.

Si vs avoz tchoezi Gnome, alez vey cisse pådje la.