Èn adrovaedje a openSUSE

• Aberweter li plake lazer CD ou DVD d’ openSUSE
• Astaler openSUSE

Douvént k’ ons a tchoezi Linux po rmete e walon

Vey eto Linux, çwè ski c’ est d’ ça?.

openSUSE est ene distribucion Linux. Ene distribucion est ene sôre di modêye di Linux ki rashonne li nawea Linux et totès sôres d’ usteyes et d’ programes. I gn a sacwantès distribucions Linux mins eles sont todi basteyes sol minme båze et son côpatibes, c’ est djusse li gosse ki candje.

C’ est l’ sistinme Linux k’ a stî tchoezi pos esse rimetou e walo gn a ddja dpus d’ dijh ans did ci. Çou sistinme d’ operance est on libe programe: i vs dene li droet del candjî eyet del mete a vosse môde (e walon, dijhans) eyet del cossemer librumint, ttosu lontins k’ vos dnez ås ôtes li minme droet.

Les eterprijhes come Microsoft oudonbén Apple n’ ont pont d’ agrès po taxhler ses cwårs po des mançîs lingaedjes k’ i gn a waire di djins ki ls eploynut. Dipus, les djins k’ ont ratourné tos ces programes e walon boutnut po rén, al måjhon, cwand elle ont do tins a piede, et imnut mia dner leu tins po k’ ça sieve a totes les djins purade k’ a ene societé capitalisse. Ele pinsnut eto k’ ådjourdu Linux est stocaesse, fiyåve, åjhey eyet côpatibe assez pos esse eployî pa totes les djins et nén k’ pas les infôrmatikîs.

Douvént k’ ons a tchoezi openSUSE et nén Ubuntu?

Ons åreut plou bouter avou Ubuntu, ene ôte distribucion mo populaire, mins openSUSE est ossu bén fwaite eyet åjhey a eployî k’ leye. openSUSE eploye li scribanne KDE k’ est bén mia ratourné e walon kel sicribanne Gnome, li ci k’ est eployî pas Ubuntu.

Si vs voloz ene ôte distribucion Linux e walon, vos ploz sayî Mandriva oudonbén Moblin.

Douvént k’ on s’ sieve do rfondou walon

Vey eto Li rfondou walon

Nos avans tchoezi l’ rifondou walon pask’ i permet d’ eployî et d’ fé des noû-mots d’ éndjolike. Nos l’ avans tchoezi eto pask’ i permet d’ awè l’ pus grande båze d’ uzeu possibe k’ on n’ årént djamåy yeu en eployant onk des pårlers do walon, rastrindou a on ptit payis. Ça permet ossu d’ awè pus di ratourneus, k’ i vegnnut d’ Lidje, di Nameur, do Roman Payis, d’ Tchålerwè ou co d’ Libin... Nos pinsans kel rifondou walon est l’ avni do walon lingaedje.

Wice k’ i sont mes programes ki dj’ aveu dins Windows?

Linux est èn ôte sistinme ki Windows et ons eploye sovint des ôtes programes ki sont, li pupårt, libes po fé les minmès afwaires (come dins MacOS wice ki vs ni rtrovroz nén ttafwait les minmes programes ki dins Windows).

Dins openSUSE, ene banslêye di programe sont ddja astalé port vos avou l’ sistinme. Voci on tåvlea po rtrover çou k’ vos cachîz après dins l’ modêye KDE d’ openSUSE. Les progames e cråssès letes sont-st e walon, les cis e clintcheyès letes sont-st e francès (ou inglès) eyet les cis avou ene sitoele ni sont nén astalés por vos pal vicante plake di l’ astalaedje do sistinme.

Les tapes emacralêyes

Dins Windows, cwand l’ waitroûle s’ edjale ou k’ on programe ni respond pus, ons a des emacralêyes tapes come CTRL+ALT+Delete po touwer on programe ou co renonder l’ copiutrece. Voci les tapes a conoxhe dins openSUSE:

• Ctrl+Alt+Esc: Touwer on purnea. Si vos tchôkîz ces tapes eshonnes, li cursoe s’ candjrè e tiesse di moirt. Clitchîz sol programe ki toûne sot pol touwer. Si vos vloz rvini en erî et fé disparexhe li tiesse di moirt, tchôkîz so Esc.
• Ctrl+Esc: Vos drove li corwaitoe do sistinme come li Ctrl+Alt+Del dins Windows. Vos avoz l’ lisse di tos les programes/processus en alaedje ki savoz touwer. Vos ploz ossu vey li tchedje do sistinme.
• Alt+F2: Enonde KRunner. KRunner vos permet d’ enonder on programe ki vos n’ trovez nén el mwaisse dressêye (tapez s’ no eyet voeyoz l’ rizultat pa dzo). Si vs tchôkîz l’ deujhinme boton a pårti del hintche, vos ploz ariver å purnea po touwer des programes/processus.
• Ctrl+Alt+En erî tchôkîz deus côp abeymint: touwer l’ session grafike eyet rivni al waitroûle d’ elodjaedje sins renonder l’ copiutrece. Si vosse session fwait des rujhes, alez dins Sôre di session eyet tchoezi failsafe session, ça enondrè ene session sins rujhe.

Si gn a vraiymint rén ki respond, sayîz çouci:

• Ctrl+Alt+F1: Vos permet d’ drovi ene conzôle (môde tecse come dins MS Dos). Po renonder l’ sistinme, elodîz vs (c’ est normå si vos n’ voeyoz pont d’ pititès sitoeles cwand vos tapez l’ sicret) eyet tapez reboot ey adon tchôkîz l’ tape Intrêye.
• Ôtrumint, vos avoz co todi l’ boton d’ distindaedje... mins vos aloz kécfeye fé do må a vos fitchîz. Ni fjhoz ça ki si vos n’ savoz rén fé d’ ôte.

Root, manaedjeu, uzeu, home, pårticion... Cwè ç’ çoula? Comprinde Linux

Minme si s’ siervi d’ on scribanne Linux, ça n’ est nén foirt diferin ki d’ si siervi di Windows oudonbén d’ MacOS, i gn a des afwaires ene miete diferinnes si vs voloz comprinde çou k’ vos dmande pa des côps vosse sistinme. Vola kékès "conceptes" di båze pos openSUSE et po Linux.

• Les uzeus: Linux est on sistinme avou sacwants uzeus. Èn uzeu est ene sakî conoxhowe pal sistinme avou on login (li no di l’ uzeu) eyet on sicret (li mot di passe). Tchaeke uzeu a des droets: i sait fé des sacwès mins nén ds ôtes. C’ est foirt important pol såvrité. I gn a todi pol moens deus uzeus: root eyet èn uzeu normå.
  • L’ uzeu normå (ou les uzeus normås): C’ est mi ou c’ est vos-ôtes. L’ uzeu normå a l’ droet d’ enonder les programes, sait moussî dins l’ ridant da sinne (come "Mes Documents" dins Windows), sait candjî des afwaires loyeyes å scribanne (candjî l’ tapisreye, li grandeu eyet l’ finté del waitroûle, etet.), lére del muzike ou des videyos, broûler des plakes lazer, aler sol daegntoele ou co evoyî des emiles mins i n’ sait nén moussî ezès ridants ds ôtes uzeus, astaler ou oister des programes ou candjî des fitchîs do sistinme. Cwand i vout fé des sfwaitès afwaires, li sistinme l’ arinnrè po lî dmander l’ sicret do manaedjeu root.
  • Root, ossu lomé li manaedjeu (ou su come "super-user"): sait tot fé so voste éndjole: astaler eyet oister des programes, candjî ou disfacer des fitchîs sistinme, candjî les droets des uzeus, aler vey dins les ridants specifikes ås ôtes uzeus et tchik et tchak. Pol dire ôtrumint, il a tos les droets. Mins pos ene råjhon d’ såvrité, on n’ va djamåy enonder ene session do scribanne elodjî come root, c’ est trop dandjreus. S’ ene sakî arive a rintrer dins voste éndjole dabôrd ki vs estoz root (pal daegntoele metans), i sårè distrure tot vosse sistinme cas î sait moussî dins totes les coines. Cwand vos dvoz fé ene accion di manaedjmint (ki fåt esse root, come astaler on programe, ene novele sicrirece, radjouter èn uzeu, evnd.) a pårti di vosse session normåle, li sistinme vos arinnrè po vos dmander l’ sicret di root. Vos n’ seroz adon idintifyî come root ki po fé ciste accion la et rén d’ ôte.
• Li coxhlaedje do sistinme Linux: Les ridants et les plakes d’ on sistinme Linux ni sont nén organijheyes come dins Windows mins ça rshonne bråmint al manire ki c’ est fwait dins MacOS. Vaici, pont di "A:", "C:’, di "\" ou co d’ ridant "Program Files". Tote les plakes (et pårticions) sont ramexhnêyes dins on seu coxhlaedje. Tchake deure plake, plake lazer, plakete ou clé USB est metowe dins on ridant. On dit k’ elle est montêye dins c’ ridant la. Les diferins liveas inte les ridants sont notés pas des "/" et nén des "\". Voci les ridants ahessåves a conoxhe po comincî.
  • / - C’ est l’ prumî ridant do sistinme, li raecene di cit ci. C’ est dins l’ ridant raecene k’ on trove les ôtes ridants. Tos les componints do sistinme si trovnut dins des ridants efants del raecene "/" come /bin, /boot, /dev, /etc et tchik et tchak. C’ est come li ridant "C:\Windows" on î mousse rålmint.
  • /home - C’ est l’ ridant ewou çki sont metous tos les uzeus et leus dnêyes. C’ est on pô l’ minme kel ridant "Users and settings" dins Windows. I gn a dins /home ostant d’ ridant k’ i gn a d’ uzeus (a pårt root ki s’ trove dins /root). Dins l’ ridant måjhon di tchaeke uzeu on trove ses documints (c’ est la k’ vos alez schaper vos tecses, mete vos fotos et vos ôtes fitchîs) mins ossu les apontiaedjes et les fitchîs des diferins programes come les emiles, Firefox, etet... Ces apontiaedjes et ôtes fitchîs des programes sont catchîs et atacnut avou on pont (i gn a, metans, e ridant /home/tux/.mozilla les apontiaedjes et l’ muchete ("cache") des programes di Mozilla come Firefox). Po vey les fitchîs catchîs, alez dins Dolphin, li manaedjeu des fitchîs eyet clitchî el dressêye Vey>Mostrer fitchîs catchîs. Èn uzeu n’ a nén l’ droet d’ aler vey et candjî des fitchîs dins l’ ridant måjhon des ôtes uzeus. Mins on sait cwand minme pårtaedjî des ridants avou ds ôtes uzeus.
  • /usr/bin - On trove vaila tos fitchîs pos enonder les programes normås k’ i n’ ont rén a vey avou l’ manaedjmint do sistinme. Si vos cachîz après on programe po drovi on documint k’ on vs a evoyî pas emile et k’ i n’ est nén dins l’ lisse, sayîz del trover dins /usr/bin. Asteme, dins Linux les fitchîs enondåve (exécutables) n’ ont nén l’ cawete ".exe". I n’ ont sovint pont d’ cawete ou bén l’ cawete ".bin" (come binaire). Les ôtes fitchîs do programe sont dins des ôtes ridants. Inla, on sait trover e minme ridant tos les enondeus des programes.
  • /media - Cwand vos stitchîz ene plake lazer ou ene clé USB, openSUSE va "monter" otomaticmint cisse lale dins l’ ridant /media. Si vosse clé ou plake a on no, metans "CDopenSUSE", ele aparexhrè dins /media/CDopenSUSE. Sel n’ a pont d’ no, ele serè metowe dins /media/disk. Mins n’ åyoz nén sogne, vosse clé ou vosse plake aparexhrè otomaticmint dins l’ manaedjeu des fitchîs pa dzo les diferinnès deurès plakes eyet ene pitite usteye sol sicribanne vos permetrè d’ î potchî sins l’ diveur cweri dins les ridants.
  • /swap - C’ est on ridant ewou çk on n’ sait nén moussî ddins. C’ est la, dins l’ pårticion di pårtaedje, kel sistinme wåde les informåcions so les bouyes enondêyes mins edoirmowes cwand ele n’ a pupont d’ plaece ele vicante memwere (li RAM).
• Pårticions: On sistinme Linux est cåzu todi astalé so sacwantès pårticions, c’ est insi pol såvrité, c’ est ossu pus åjhey pa des côps. Pårti ene deure plake, ça vout dire taeyî a bokets (les pårticions) vosse deure plake come si c’ esteuve sacwantès deurès plakes. On sait todi, s’ on rastale li sistinme, candjî les pårticions ou les rmete eshonne. openSUSE vos propôzrè, come prémetou, troes pårticions pol sistinme Linux: Li pårticion raecene "/", li pårticion SWAP "/swap" eyet l’ pårticion måjhon "/home".
  • Li pårticion /home est metowe a pårt po k’ si gn a on hapeu k’ intere dins vosse sistinme i n’ sepe nén aler pus lon kel pårticion "/home", pa wice k’ il a-st intré, et n’ nén distrure tot vosse sistinme. Dipus, si vs metoz a djoû vosse sistinme ou si vos dvoz l’ rastaler, vos ploz ttafwaitmint abwesner et rastaler vosse pårticion raecene, ewou çk on a les programes sins piede vos dnêyes des uzeus (emiles, apontiaedjes des programes, do scribanne...) pask’ ele sont dins ene ôte pårticion, li pårticion "/home". Foirt ahessåve.
  • Li pårticion "/swap" est abwesnêye sorlon on sistinme di fitchî speciå et aide li memwere RAM cwand gn a bråmint des programes ki rotnut eshonne.
  • I gn a el pårticion raecene "/" tos les ôtes ridants ki sont les ridants do sistinme avou les programes, les livreyes éndjolikes et tot l’ sistinme.
• Pititès et grandès letes: Linux fwait l’ diferince inte les ptitès et les grandès letes. Si vos vloz dire li fitchî Scrijhaedjes.txt, vos n’ poloz nén taper scrijhaedje.txt. C’ est l’ minme po les nos d’ uzeu et les sicrets.

Les waerbeas eyet l’ côpe-feu: li såvrité dins openSUSE

Come dins les Mac, i gn a cåzu nou waerbea (virus) dins Linux. Dipus, li sistinme est bén pus såve ki Windows et 99 % des waerbeas sont fwaits pos ataker Windows et n’ ont pont d’ efet so les sistinmes Linux. Si vs drovoz on fitchî avou on waerbea dins èn emile, i n’ duvreut rén s’ passer dins vosse sistinme Linux. Mins nerén, si vos revoyîz cist emile a ene amisse k’ a on sistinme Windows, i pôreut esse ataké. C’ est pocwè il est possibe d’ astaler èn anti-waerbea dins openSUSE come ClamAV ou Antivir.

openSUSE a on côpe-feu prémetou dins l’ sistinme. Si vos l’ voloz apontyî, alez dins l’ Cinte di controle di Yast.

Po fini, come i gn a pont d’ waerbea, kel côpe-feu est prémetou et k’ on hapeu k’ intere ni sait nén distrure tot l’ sistinme paski n’ sait nén rexhe del pårticion ewou çki s’ trove, on pout dire ki Linux, et don openSUSE, est on sistinme ki vs poloz eployî al coete sins beacôp d’ dandjî.

Comint astaler on programe? Çou k’ i n’ fåt nén fé!

Vos avoz l’ abutude dins Windows d’ aler sol daegntoele, d’ aberweter on fitchî "install.exe", del dobe-clitchî eyet d’ "shûre les esplikêyes". Si vs sayîz d’ fé l’ minme dins openSUSE ça va rade esse pé k’ amon Laca et vos alez awè des mås d’ tiesse et vos alez fé do må a vosse sistinme.

Les fitchîs avou les programes didins sont des fitchîs RPM (avou ene cawete ".rpm"). Les fitchîs RPM sont metous eshonne dins des depots (des rmijhes ewou çk on ramexhene les RPM eshonne). Ces depots sont sol daegntoele (so les sierveus d’ openSUSE) ou sos ene plake come li DVD d’ openSUSE. Vos ploz radjouter des noveas depots en alant e manaedjeu des depots k’ on trove dins l’ Cinte di controle di Yast. I gn a deus depots oficires prémetous a l’ astalaedje avou dedja des meyes di programes libes (et nén libes). Pos astaler des RPM i gn a deus façons del fé.

Vos ploz aprume aler dins Yast et tchoezi Manaedjî programes. Cachî après li programe ou l’ RPM eyet l’ astaler. Vey ossu Astaler on programe avou Yast (KDE)

Vos ploz ossu eployî li "On clitche astale". On fitchî "On clitche astale" (cawete ".ymp") est on fitchî ki vs astalrè direk li programe on pô come les "install.exe" di Windows. Vos les ploz trover dins des waibes ki cåznut d’ openSUSE (i nd a sacwants so Walotux) oudonbén sol poite waibe [http://software.opensuse.org/search]. Vos ploz taper l’ no do programe ki vs cachîz après et i vs donrè tos les cis k’ i gn a so les depots openSUSE oficires ou cominåltaires. Vos ploz ossu cweri après on "On clitch astale" dins l’ module "Cweraedje di pacaedje (pal waibe)" do Cinte di ontrole di Yast. Clitchîz sol loyén ou l’ fitchî "On clitch astale" et on purnea s’ drovrè. Shuvoz les instruccions et vs pôroz astaler l’ programe.

Çou k’ i n’ fåt nén fé cwand on n’ est nén èn éndjoleu ki sait çk’ i fwait (minme s’ ene sakî dins on forom vos dit k’ c’ est ça ki fåt fé):

• Côpiler on programe a pårti des sourdants aberwetés del daegntoele. I gn a beacôp d’ tchance k’ on l’ trove dedja copilé pos openSUSE dins ses depots.
• Aberweter des fitchîs RPM a pårti d’ waibes trovêyes avou Google et ls astaler al mwin. Tos les RPM ki vont s’ trovnut dins les depots oficires ou cominåltaires.
• Astaler des RPM e roye di cmande dins ene conzôle. I gn a des usteyes grafike pol fé.
• Astaler des RPM ki sont fwaits pos ene ôte distribucion Linux ou ene ôte modêye d’ openSUSE.

Li rantoele sins fyi

Normålmint, si vs avoz on raloyaedje direk ADSL pa fyi, sel fyi est stitchî a l’ enondaedje, openSUSE li riconoxhrè otomaticmint et vos åroz l’ daegntoele.

Si tot va bén et k’ les mineus po vosse cwåte wifi sont dins openSUSE, vos n’ åroz pont d’ rujhe. openSUSE l’ aponteyrè otomaticmint a l’ astalaedje. Vos trovroz el boesse ås imådjetes sistinme [1], ene pitite aplikete do ManaedjeuRantoele. S’ ele n’ est nén la, alez cweri el dressêye "KNetworkManager".

Vos ploz ossu manaedjî vosse rantoele d’ ene façon nén candjante. Po ça, enondez Yast (li cinte di controle d’ openSUSE) eyet apontyî vosse rantoele dins Éndjins rantoele > Tchuzes del rantoele. C’ est la k’ vos ploz tchoezi sel rantoele est manaedjeye pa Yast ou pal ManaedjeuRantoele (KNetworkManager).

Si vosse cwåte n’ est nén ricnoxhowe et ki c’ est ene cwåte avou ene tchike Atheros, sayî aprume d’ astaler les mineus [2] Madwifi. Vizitez http://fr.opensuse.org/Atheros_madwifi po sawè cwè et kesses.

Si Madwifi ni va nén i vos dmore co Ndiswrapper. I vs permet d’ astaler l’ mineu po Windows (li ci k’ est sol plake lazer do vindeu ou so s’ waibe) dins Linux. Vizitez http://fr.opensuse.org/Wireless_Network_Card_Installation po ndè sawè dpus.